Waqaytaqa waqankicha yawartaraq,

imaynatan waqachiwanki

noqa pachamamaykita.

Ch’arwi kawsaynikiwan,

p’akisqa purinaykiwan.

Ch’uyanchallatan mañakunki unutapas,

qochakunapi, parakunapi, mayukunapipas,

makiykiwantaq ch’akichinki sirk’ayta.

Paqariy pukyuykunatapas

qhaturapunkin qolqeyuq runakunaman.

Kamachikuqpakqa manan kayquchu

qori qolqen chirmachin sonq’onkuta,

yuyayninpas kutirpanñan,

qonqapunkun wayralla rimayninkuta.

Suyasallanin pantayninkuta.

Teqse muyupas thuniy thuniyllan

runakunaq salqa mich’ayninwan,

tususparaqmi ch’allupunku llank’aytapas.

Yankallanmi takinkupas

ch’usaqllatan qelqankupas.

Maymanraqcha atipakunqaku

awqa awqaylla supayninwan.

Mana runakuna tatichiqtinqa,

mana ayllukuna sayariqtinqa,

mana llaqtakuna qhapariqtinqa.

Ch’usaq ch’usaqmampaschá

tukupusun tapurikuni?

Manataq Apu Yaya taytachapas

rimayninta chayachimunchu,

wañupunpaschá?

Hoqmantacha qallarinkichis

pisillamanta wasichakuytapas,

lloqlla pachakutiyta tukuchimoqtiy.

Waranqa, pachaq, chunqa watamantapas,

kutinpullasaqmi, manan qonqawanankichu…